កីឡា៖ កីឡាករ និងអ្នកគាំទ្រទាំងអស់របស់ Arsenal កំពុងតែសោកស្តាយ ក្រោយធ្លាក់ទាំងមិនអស់ចិត្តដោយលទ្ធផលប្រផិតប្រផើយទល់នឹង Bayern Munich ក្នុងវគ្គ ៨ក្រុមចុងក្រោយ UEFA Champions League ក៏ប៉ុន្តែគ្រូបង្វឹករបស់ក្លិបគឺលោក Mikel Arteta ថ្លែងថា ក្លិបនៅមាន "វត្ថុដ៏ស្រស់ស្អាតមួយ" កំពុងរង់ចាំបន្ត ពោលគឺការប្រកួតប្រជែងជើងឯកយ៉ាងស្វិតស្វាញនៅក្នុងក្របខណ្ឌ Premier League។ 

គួរបញ្ជាក់ថា បរាជ័យទល់នឹង Bayern Munich កាលពីយប់មិញនេះគឺជាការរបូតបាត់ពានរង្វាន់មួយទៀតក្នុងរដូវកាលនេះ ពោលគឺនៅសល់តែពានរង្វាន់លីគកំពូលមួយប៉ុណ្ណោះដែល Arsenal នឹងត្រូវប្រជែង ខណៈពានក្នុងស្រុក ២ផ្សេងទៀតរួមមាន FA Cup និង EFL Cup ក៏បានរបូតបាត់រួចទៅហើយដែរ។ ក្រុមមានមូលដ្ឋាននៅភាគខាងជើងទីក្រុងឡុងដ៍នេះ កំពុងប្រមាញ់ពានលីគកំពូលយ៉ាងស្អិតដោយបច្ចុប្បន្នឈរនៅលេខ ២ មាន ៧១ពិន្ទុស្មើជាមួយ Liverpool តាមពីក្រោយ Man City ដែលកំពុងឈរនៅលើកំពូលតារាងចំនួន ២ពិន្ទុ។ 

ថ្លែងទៅកាន់អ្នកសារព័ត៌មានកាលពីយប់មិញ លោក Arteta និយាយថា៖ "អ្វីដែល (កីឡាករ) ត្រូវការបំផុតគឺពួកយើងនឹងនៅតែឈរក្បែរពួកគេ ដោយផ្តល់ការគាំទ្រ សេចក្ដីស្រឡាញ់ ហើយយើងនឹងត្រៀមខ្លួនបានល្អបំផុតជាមួយការប្រកួតដ៏ធំនាថ្ងៃសៅរ៍នេះ។ ទោះបីជាយើងមានភាពឈឺចាប់ជាមួយបរាជ័យនេះ ប៉ុន្តែយើងនឹងប្រកួតឱ្យអស់ពីអ្វីដែលយើងមានទល់នឹង Wolves ជាពិសេសដើម្បីពាន Premier League ដែលយើងចង់បាន"។

គួររំឮកថា នេះគឺជារដូវកាលដំបូងបង្អស់របស់ Arsenal ក្នុងពានរង្វាន់កំពូលទ្វីបអឺរ៉ុប UEFA Champions League រាប់ចាប់តាំងពីឆ្នាំ២០១៧ និងជាការឈានដល់វគ្គ ៨ក្រុមចុងក្រោយជាលើកដំបូងរាប់ចាប់តាំងពីឆ្នាំ២០១០៕